ဆံသားအဆီပြန်လို့ စိတ်ညစ်နေတဲ့သူတွေအတွက်လည်း နည်းလမ်းကောင်းကိုမျှဝေပေးသွားပါမယ်။ ဆံသားအဆီပြန်ရင် ခေါင်းခဏခဏလျှော်ရသလို ခဏလေးနဲ့ အဆီပြန်လို့ သိပ်စိတ်ညစ်ရပါတယ်။ ဒါ့ကြောင့် ဒီနည်းလမ်းလေးကိုမျှဝေပေးလိုက်တာပါ။
ပါဝင်ပစ္စည်း
ပြောင်းဖူးကော်မှုန့် စားပွဲတင်ဇွန်း ၆ ဇွန်း
ဆန်မှုန့် စားပွဲတင်ဇွန်း ၆ ဇွန်း
မှုန့်ဖုတ်ဆိုဒါ (Baking Soda) စားပွဲတင်ဇွန်း ၃ ဇွန်း
အုန်းဆီ ၁၀ စက်
သံလွင်ဆီ ၁၀ စက်
ဘူးတစ်ခု
ပြင်ဆင်ခြင်း
ဘူးတစ်ခုထဲကို ပြောင်းဖူးကော်မှုန့်၊ ဆန်မှုန့်နဲ့ မှုန့်ဖုတ်ဆိုဒါကို ရောပြီးထည့်လိုက်ပါ။ ပြီးရင် သေချာရောသွားအောင် လှုပ်ခါလိုက်ပါ။ ပြီးရင် အုန်းဆီနဲ့ သံလွင်ဆီထည့်ပြီး လှုပ်ခါပေးလိုက်ပါ။
သေချာရောသွားပြီဆိုရင် အသုံးပြုလို့ရပါပြီ။
ဘယ်လိုသုံးမလဲ
မှန်ရှေ့ ရပ်လိုက်ပါ။ ဆံပင်တွေကို ခွဲလိုက်ပြီး အဲဒီရောထားတဲ့ဟာကို ဦးရေပြားပေါ်မှာ ဖြူးပေးပါ။ ပြီးရင် လက်လေးနဲ့ ဦးရေပြားတစ်ခုလုံးကို နှံ့သွားအောင်နှိပ်ပြီး ဖြန့်ပေးပါ။ ဖြည်းဖြည်းလေးနှိပ်ပေးသင့်ပါတယ်။ ၅ မိနစ် ၁၅ မိနစ်လောက်ထားပြီးရင် ခေါင်းဘီးနဲ့ အဖြူရောင်အမှုန့်တွေ ကျသွားအောင် ဖြီးချလိုက်ပါ။ ပြီးရင် ခေါင်းလျှော်ချလိုက်ပါ။
