စာရေးသူခဏခဏပြောနေကျလိုပဲ အဆီကျချင်ရင် ပျင်းနေလို့မရပါဘူး။ လေ့ကျင့်ခန်းမလုပ်လို့ကိုမရပါဘူးရှင့်။ အစားလျှော့ပြီး ဝိတ်ချဖူးတဲ့သူတွေ ရှိမှာပါ။ ကိုယ်လည်းချဖူးပါတယ်။ ညစာမစားဘဲ ၁ နှစ်ကျော်လောက်နေဖူးတယ်။ ဘာမှမထူးပါဘူး။ ဗိုက်တော့မပူပေမယ့် အရင်က ဝထားတဲ့အခံရှိတော့ ဗိုက်နားမှာ အရေပြားတွေက တွဲနေတာ တွန့်နေတာတွေဖြစ်ပါတယ်။ ဒါ့ကြောင့် လေ့ကျင့်ခန်းပြောင်းလုပ်ပါတယ်။အစားလည်းလျှော့စရာမလိုပါဘူးရှင့်။
အဲ…..ဒါပေမယ့် အဆီတက်စေတဲ့ အစားအစာကိုတော့ ရှောင်ရပါမယ်။ ပေါင်သားလည်းဒီလိုပါပဲ။ MyHealth Myanmar ကို ဖတ်ရှုအားပေးနေ ကြတဲ့ စာဖတ်သူတွေထဲမှာ ဗိုက်သားနဲ့ပတ်သက်လို့ လေ့ကျင့်ခန်းတွေတင်ပေးပါဆိုလို့ ဗိုက်သားချပ်စေတဲ့ လေ့ကျင့်ခန်းတွေလည်း အများကြီး တင်ပေးထားပါတယ်။ ရှေ့ဆက်လည်းတင်ပေးသွားဦးမယ်နော်။ အခုတော့ ပေါင်နဲ့ တင်သားကိုအလှည့်ပေးကြရအောင်။
မြန်မာအမျိုးသမီးအများအားဖြင့် ပေါင်တုတ်ကြပါတယ်။ အထူးသဖြင့် ပေါင်အတွင်းဖက်မှာ အဆီများကြတယ်။ အဲဒီအတွက် စိတ်မပူပါနဲ့ လေ့ကျင့်ခန်းလုပ်လိုက်ရအောင်နော်။ အခုဖော်ပြမယ့်လေ့ကျင့်ခန်းတွေဟာ ပေါင်သားနဲ့ တင်သားအတွက်ကောင်းမွန်ပါတယ်။
၁။ Pilates Inner Thigh Leg Lifts
အရင်ဆုံး ဘေးစောင်းလှဲနေပါ။ ခြေထောက်တစ်ဖက်ကို အပေါ်မှာရှိတဲ့ ခြေထောက်ကို အရှေ့ဖက်ချလိုက်ပြီး လက်တစ်ဖက်နဲ့ကိုင်ထားပေးပါ။ ပြီးရင်ကျန်လက်တစ်ဖက်ကို ခေါင်းမှာထောက်ထားလိုက်ပါ။ ပြီးရင် ချထားတဲ့ခြေထောက်တစ်ဖက်ကို အပေါ်တန်းတန်းမတင်ပေးပါ။ ဖြည်းဖြည်းချင်းမရပါမယ်။ ပြီးရင်ပြန်ချပါ။ လွယ်ပါတယ်နော်။အကြိမ် ၂၀ ပြည့်ရင် နောက်တစ်ဖက်ပြောင်းပါ။ ဘယ်ညာ ၄ ကြော့ဖြစ်ပါတယ်။
၂။ Froggy Squat
Squat ထိုင်ဖူးကြလားရှင့်။ Squat ထိုင်တာကတော့ ခါးကိုမတ်မတ်ထားမယ်။ တင်ကိုနောက်ပစ်မယ်။ ခြေထောက်နှစ်ဖက်ကို နည်းနည်းကားပြီး တစ်ဝက်ထိုင်တာကို ဆိုလိုတာပါ။ အခုတော့ အပြည့်ထိုင်မယ်နော်။ ကိုယ်ထိုင်နိုင်သလောက် အောက်ဆုံးထိ ထိုင်ချပေးလိုက်ပါ။ ပြီးရင်ပြန်ထပါ။ အဲဒီအတိုင်း ၁၂ ကြိမ် ၄ ကြော့လုပ်ပေးပါ။
၄။ Side Lunge
အရင်ဆုံး ခြေထောက်နှစ်ဖက်ကို ကားထားပါ။ ပြီးရင် တစ်ဖက်ကိုယိမ်းလိုက်ပါ။ ယိမ်းလိုက်တဲ့ဖက်ကို ဒူးလေးနည်းနည်းထောင်ပေးလိုက်ပြီး ကျန်တစ်ဖက်ကို တန်းတန်းဆန့်လိုက်ပါ။ ပြီးရင် ကျန်တဲ့ခြေထောက်ကို ဘေးဖက် ကန်ထုတ်လိုက်ပါ။ နောက်တစ်ဖက်ပြောင်းပါ။ ဘယ်ညာကိုမှ ၁ ကြိမ်လို့မှတ်ပါ။ ၁၂ ကြိမ် ၄ ကြော့ဖြစ်ပါတယ်။
၅။ Pile Squat
အခုပုံမှာပြထားသလို ခြေထောက်နှစ်ဖက်ကို ကားလိုက်ပါ။ ပြီးရင် ခြေဖဝါးကို အပြင်ဖက် နည်းနည်းထုတ်လိုက်ပါ။ ပြီးရင် ထိုင်ချပေးပါ။ ၁၂ ကြိမ် ၄ ကြော့ဖြစ်ပါတယ်။ နောက်ပိုင်း ဆရာကျသွားရင်တော့ အလေးထမ်းပြီးလုပ်လို့ရသလို အလေးမပြီးလည်းလုပ်လို့ရပါတယ်။
၅။ Bridge
အရင်ဆုံး ဒူးနှစ်ဖက်ထောင်ပြီး ပက်လက်လှဲနေပါ။လက်နှစ်ဖက်ကို ကြမ်းပြင်မှာ မောက်လျက်ချထားပါ။ ပြီးရင် ဗိုက်ကိုချပ်ထားပြီး ခန္ဓာကိုယ် အလယ်ပိုင်းကို အပေါ်ကြွပေးပါ။ အပေါ်မှာ ၂ စက္ကန့်လောက်နေပေးပြီးမှ နဂိုအတိုင်းပြန်နေပေးပါ။
