ကျွန်မတို့ ဆံကေသာ တစ်ရှူးလေးတွေရှင်သန်ဖို့နဲ့ ဆံကေသာ ပြန်လည်သန်စွမ်းဖို့အတွက် ပရိုတင်းဓာတ်ကို လိုအပ်ပါတယ်။ နို့မှာ Casein နဲ့ Whey ဆိုတဲ့ ပရိုတင်းဓာတ် နှစ်မျိုးပါဝင်ပြီး ဆံကေသာအတွက် များစွာ အကျိုးရှိစေပါတယ်။
ပရိုတင်းဓာတ် စားသုံးမှုနည်းတယ်ဆိုရင် ဆံပင်ကို ပိုပြီး ပါးစေသလို ဆံပင်ကိုလည်း အရှည်နှေးစေပါတယ်။ ပရိုတင်းဓာတ်ပါတဲ့ အစားအစာတွေကို စားသုံးပေးမယ်ဆိုရင် ဆံပင်ကို ပိုပြီးသန်စွမ်း တောက်ပြောင်စေမှာပါ။ နို့မှာပါတဲ့ ပရိုတင်းဓာတ်တွေဟာ ဆံကေသာအတွက် ဘယ်လိုအကျိုးကျေးဇူး ရှိသလဲဆိုတာ မျှဝေပေးသွားမှာဖြစ်ပါတယ်။
၁။ ဆံကေသာကို သန်စွမ်းတောက်ပြောင်စေခြင်း။
နို့မှာပါဝင်တဲ့ ပရိုတင်းဓာတ်တစ်မျိုးဖြစ်တဲ့ Whey ဟာ ဆံပင်ကျွတ်တာကိုသက်သာစေပြီး ဆံကေသာကို သန်စွမ်းစေပါတယ်။ ကိုယ်အလေးချိန်တက်စေဖို့နဲ့ ကြွက်သားသန်မာဖို့အတွက် အားကစားသမားတွေ ဖြည့်စွက်စာအဖြစ်သောက်သုံးတဲ့ Whey Liquid အရည်ဟာ ဆံပင်ပေါက်တဲ့ Follicles လေးတွေကို လှုံ့ဆော်ပေးနိုင်ပါတယ်။
ဒါ့ကြောင့် ဆံကေသာကို သန်စွမ်းတောက်ပြောင်စေဖို့အတွက် Whey Liquid ကို အသုံးပြုကြပါတယ်။ ကြက်ဥအနှစ် (၁) လုံး၊ ပျားရည် နည်းနည်းနဲ့ Whey Liquid အရည်ကို သေချာရာပြီး ဦးရေပြားနဲ့ ဆံကေသာ အနှံ့ကိုလိမ်းပေးပါ။ ပြီးရင် ဦးရေပြားကို ညင်သာစွာနှိပ်နယ်ပေးပြီး တဘက်ပူပူနဲ့ မိနစ် ၂၀ လောက်ပေါင်းပေးထားပါ။ အဲ့ဒီနောက် ခေါင်းလျှော်ရည်၊ ပေါင်းဆေးတို့နဲ့ ခေါင်းသေချာပြန်လျှော်ပေးမယ်ဆိုရင် ဆံကေသာကို သန်စွမ်းတောက်ပြောင်လာစေမှာဖြစ်ပါတယ်။
၂။ ဆံကေသာကို သန်စွမ်းစေခြင်း။
Casein ဆိုတဲ့ ပရိုတင်းဓာတ်တစ်မျိုးမှာ Glutamine ဆိုတဲ့ အမိုင်နိုအက်ဆစ်ပါဝင်လို့ ဆံကေသာ သန်စွမ်းစေဖို့ အဓိက အသုံးပြု ကြပါတယ်။ Casein နဲ့ Whey ဆိုတဲ့ ပရိုတင်းဓာတ်တွေပါဝင်တဲ့ နို့ထွက်ပစ္စည်းတွေဟာလည်း ဆံကေသာအတွက်ကောင်းမွန်ပါတယ်။
၃။ ဆံကေသာကို ပြုပြင်ပေးခြင်း။
ဆံပင်အရောင်ဆိုးထားတဲ့သူတွေပဲဖြစ်ဖြစ်၊ ဆံပင်အဖျားနှစ်ခွဖြစ်တဲ့သူတွေပဲဖြစ်ဖြစ်၊ ဆံပင် ထိခိုက်ပျက်စီးနေရင်ပဲဖြစ်ဖြစ် ပရိုတင်းဓာတ်လိုအပ်ပါတယ်။ ပရိုတင်းဓာတ်ဟာ ဆံကေသာ ထိခိုက်ပျက်စီးမှုကို အထိရောက်ဆုံး သက်သာပျောက်ကင်းစေတာကြောင့် ဆံပင်အရောင်ဆိုးထားတဲ့သူတွေရော၊ ဆံသားပျက်စီးနေတဲ့သူတွေရော ပရိုတင်းပါဝင်တဲ့ ခေါင်းလျှော်ရည်ကို ရွေးချယ်သုံးပေးသင့်ပါတယ်။
ဆံကေသာကျန်းမာသန်စွမ်းဖို့ ဆံကေသာကို သေချာဂရုစိုက်ထိန်းသိမ်းပေးတာနဲ့ကျန်းမာရေးနဲ့ညီညွတ်တဲ့ အစားအစာတွေ စားပေးဖို့ လိုသလို နို့ပရိုတင်းဓာတ်ပါဝင်တဲ့ ခေါင်းလျှော်ရည်သုံးဖို့လည်းအရေးကြီးပါတယ်။
