မိမိရဲ့ကိုယ်ခန္ဓာ ကျစ်လစ်လှပမှုရှိစေရန်အတွက် လူအများစုဟာ Gym သွားပြီး လေ့ကျင့်ခန်းတွေ လုပ်ကြပါတယ်။ သို့သော်လည်း တခါတလေမှာ အချိန်မရှိလို့၊ စိတ်မပါလို့ စသဖြင့် အကြောင်းအမျိုးမျိုးကြောင့် မလုပ်ဖြစ်တာများပါတယ်။ ဒီလိုမျိုးပြဿနာတွေကို ဖြေရှင်းဖို့အတွက် နည်းလမ်းကတော့ လွယ်လွယ်လေးပါပဲ။

ထိုင်ခုံမှာထိုင်နေရင်းနဲ့ကို လုပ်ဆောင်နိုင်မယ့် လေ့ကျင့်ခန်းလေးတွေဖြစ်တာကြောင့် ရုံးမှာဖြစ်ဖြစ်၊ အိမ်မှာတီဗွီကြည့်ချိန်ဖြစ်ဖြစ် အလွယ်တကူလုပ်ဆောင်နိုင်မှာပါ။

သွေးပူလေ့ကျင့်ခန်း

ကြွက်သားတွေကို သွေးပူလာစေဖို့အတွက် ကူညီပေးမယ့်လေ့ကျင့်ခန်းဖြစ်ပါတယ်။

ထိုင်ခုံအစွန်းဖျားမှာထိုင်ပြီး လက်နှစ်ဖက်ကို ဒူးပေါ်တင်ထားပါ။ ခါးကိုမတ်မတ်ထားပြီး အနောက်ကိုဖြည်းဖြည်းချင်း မှီလိုက်ပါ။ ပုံမှန်အနေအထားပြန်သွားပြီး ထပ်ခါထပ်ခါပြုလုပ်ပေးပါ။ တခါလုပ်လျှင် ၁၀-၁၂ ကြိမ်လုပ်ပေးပါ။

ခါးလိမ်လေ့ကျင့်ခန်း

ခါးရှိကြွက်သားများကို သန်မာစေရန်အတွက် ကူညီပေးသည့် လေ့ကျင့်ခန်းဖြစ်ပါတယ်။

သွေးပူလေ့ကျင့်ခန်းအတိုင်း နေရာယူကာ လက်နှစ်ဖက်ကိုခေါင်းအနောက်မှာထားပါ။ ခြေထောက်၊ တင်တို့ကို မတ်မတ်ထားပြီး ကိုယ်လုံးကိုညာဖက်သို့ လှည့်ပေးပါ။ သုံးစက္ကန့်ကြာတောင့်ထားပြီး ဘယ်ဖက်သို့လှည့်လိုက်ပါ။ တဖက်ကို ၁၀ ကြိမ်စီပြုလုပ်ပေးပါ။

အရှေ့ကိုင်းလေ့ကျင့်ခန်း

လက်နှစ်ဖက်ကို ခေါင်းအနောက်မှာထားကာ လက်ချောင်းများကိုယှက်ထားပါ။ အရှေ့ကိုဖြည်းဖြည်းချင်းကိုင်းလိုက်ပြီး ပြန်မတ်လိုက်ပါ။ လေ့ကျင့်ခန်းပြုလုပ်ချိန်မှာ ကိုယ်သက်သာဖို့အတွက် လက်ကိုအသုံးမပြုပါနဲ့။ ၁၀ ကြိမ်လုပ်ပေးဖို့ လိုပါတယ်။

ဒူးပင့်လေ့ကျင့်ခန်း

ထိုင်ခုံမှာ သက်သောင့်သက်သာထိုင်ပြီး ခြေထောက်တစ်ဖက်ကို ရင်ဘတ်ဆီသို့ ဆွဲလိုက်ပါ။ ဒူးခေါင်းကို လက်နှစ်ဖက်ဖြင့်ကိုင်ထားပြီး သုံးစက္ကန့်ကြာနေပေးပါ။ မူလအနေအထားပြန်သွားပြီး နောက်တစ်ဖက်ပြောင်းလုပ်ပါ။ ခြေထောက်တစ်ဖက်စီကို ၁၅ ကြိမ်လုပ်ပေးပါ။

ခြေထောက်အကွေးအဆန့်လေ့ကျင့်ခန်း

ဤလေ့ကျင့်ခန်းမလုပ်မီ ခုံမြဲနေအောင် ဂရုစိုက်ပါ။ ခုံကိုမှီလိုက်ပြီး ခြေထောက်နှစ်ဖက်ပူးကာ မြှောက်လိုက်ပါ။ ဒူးကိုရင်ဘတ်ဆီသို့ကွေးလိုက်ပြီး သုံးစက္ကန့်ကြာနေပေးပါ။ ခြေထောက်ပြန်ဆန့်လိုက်ပြီး သုံးစက္ကန့်ကြာနေပါ။ ခြေထောက်ကို ကွေးလိုက်ဆန့်လိုက်လုပ်ပေးပြီး ဆယ်ကြိမ်ပြုလုပ်ပါ။

ခြေထောက်ယှက်လေ့ကျင့်ခန်း

ထိုင်ခုံကိုမှီလိုက်ပြီး ခုံတစ်ဖက်တစ်ချက်ကို လက်နှစ်ဖက်ဖြင့်ကိုင်ထားပါ။ ခြေထောက်နှစ်ဖက်ကိုမြှောက်လိုက်ပြီး ဘေးကိုအနည်းငယ်ချဲလိုက်ပါ။ ခြေထောက်တစ်ဖက်ကို နောက်တစ်ဖက်အပေါ်ယှက်လိုက်ပါ။ ဤလေ့ကျင့်ခန်းကို တစ်မိနစ်ကြာလုပ်ဆောင်ပေးပါ။

Source: BrightSide