ဝိတ်လျော့ဖို့စတင်ပြီဆိုရင် အစားလျော့စားတာတွေ၊ လေ့ကျင့်ခန်းလုပ်တာတွေထက် အရေးကြီးတာက စိတ်ပါပဲ။ စိတ်က သေချာလိုက်မလာနိုင်ရင် ဘယ်အရာမှအောင်မြင်နိုင်မှာမဟုတ်တော့ပါဘူး။ ဝိတ်လျော့ဖို့ဆိုရင်လည်း စိတ်ကိုကဝိတ်ကျဖို့ကို အားသန်နေမယ်ဆိုရင် အစားလျော့စားတာတွေ၊ လေ့ကျင့်ခန်းလုပ်တာတွေကို ပုံမှန်လုပ်နိုင်ပြီး အလေးချိန်ကိုလည်း ကောင်းကောင်းလျော့ကျနိုင်မှာပါ။
ဝိတ်လျော့တော့မယ်ဆိုရင် ပြောင်းလဲလိုက်သင့်တဲ့အတွေးအခေါ်တွေကို ဖော်ပြပေးလိုက်ပါတယ်။
ကျန်းမာရေးနဲ့ကိုက်ညီတဲ့အစားစာတွေကိုနှစ်သက်တယ်
အသီးအရွက်တွေကို များများကြိုက်နှစ်သက်တဲ့သူဆိုရင် ဝိတ်လျော့ဖို့အတွက်ပိုပြီးတော့ အဆင်ပြေပါတယ်။ တကယ်လို့ သင်ကအရင်ထဲက အသီးအရွက်တွေကို သိပ်မကြိုက်ခဲ့ဘူးဆိုရင်တော့ သင့်စိတ်ထဲမှာအသီးအရွက်တွေက ကိုယ့်အတွက်အဆင်ပြေပါတယ်။ ဒါမှလည်းဝိတ်မြန်မြန်ကျစေမှာပေါ့ဆိုတဲ့ စိတ်မျိုးကို ထည့်ထားပေးနိုင်မှ ကျန်းမာရေးကိုအထောက်အကူပြုတဲ့ အစားစာတွေနဲ့ ဝိတ်လျော့လို့ရမှာပေါ့။
ဝိတ်ကျဖို့အတွက်စီစဉ်ထားတဲ့ အစားစာတွေကို စားချင်စိတ်
ဝိတ်ကျဖို့အတွက်ဆိုရင် အရင်စားနေကျအတိုင်းပဲ စားနေလို့တော့မရဘူးပေါ့။ ဒါကြောင့် ဝိတ်ကျဖို့အတွက် ကြိုးစားနေတဲ့အချိန်မှာ စားဖို့ပြင်ဆင်ထားတာတွေကို စားချင်စိတ်ရှိတယ်ဆိုတဲ့ စိတ်မျိုးထားထားပေးရင် ပိုပြီးတော့အဆင်ပြေစေပါတယ်။ အဓိကကတော့ အသီးအရွက်တွေနဲ့၊ Salad တွေကို ကောင်းကောင်းစားပေးနိုင်ဖို့ပါပဲ။
လေ့ကျင့်ခန်းလုပ်ရတာကို နှစ်သက်ရမယ်
လေ့ကျင့်ခန်းလုပ်တယ်ဆိုတာလည်း ခန္ဓာကိုယ်ပိုပြီးလှပဖို့အတွက်၊ စိတ်ကိုလည်း လန်းဆန်းသွားစေတာကြောင့် ကြိုက်နှစ်သက်တယ်ဆိုတဲ့ စိတ်မျိုးကိုထားထားပေးဖို့တော့လိုပါတယ်။ လေ့ကျင့်ခန်းလုပ်နေတဲ့အချိန်မှာ အစပိုင်းတော့ နာကျင်တာတွေ၊ ပင်ပန်းတာတွေကို ခံစားရနိုင်တယ် ဆိုပေမယ့် တစ်ချိန်ကျရင် လှပတဲ့အရာတွေကို ပိုင်ဆိုင်လာရတော့မှာဆိုတဲ့စိတ်မျိုးနဲ့ လေ့ကျင့်ခန်းလုပ်ရတာကို နှစ်သက်နေဖို့လိုအပ်ပါတယ်။
ကျန်းမာတဲ့ခန္ဓာကိုယ်ကို ပိုင်ဆိုင်ရတာကောင်းတယ်လို့ သတ်မှတ်ထားပါ
ကျန်းမာတဲ့ခန္ဓာကိုယ်မျိုးကို ပိုင်ဆိုင်ရဖို့ဆိုတာ လေ့ကျင့်ခန်းတွေများများလုပ် အစားအသောက်တွေဆင်ခြင်ရနဲ့ဆိုတော့ နည်းနည်းတော့ပင်ပန်းမှာပေါ့။ ဒါပေမယ့် ကျန်းမာပြီးလှပတဲ့ခန္ဓာကိုယ်ကို ပိုင်ဆိုင်လိုက်ရပြီဆိုရင် နေရထိုင်ရတာရော၊ စိတ်ကိုပါလန်းဆန်းနေစေပြီး စိတ်ကျေနပ်စရာကောင်းနေမှာဆိုတဲ့ စိတ်မျိုးကိုထားထားဖို့လိုပါတယ်။
ဒီအချက်တွေအားလုံးကို အရင်ပြင်ဆင်ပြီးစိတ်ဆုံးဖြတ်နိုင်ပြီဆိုရင်တော့ သင့်ရဲ့ဝိတ်လျော့တဲ့အစီအစဉ်ကို စတင်လိုက်လို့ရပါပြီနော်။ ဒီအချက်တွေကို သေချာပိုင်နိုင်မှုရှိမှလည်း အောင်မြင်စွာနဲ့ ဝိတ်ချလို့ရနိုင်မှာပဲဖြစ်ပါတယ်နော်။
