ကျန်းကျန်းမာမာနဲ့ ကြီးထွားဖွံ့ဖြိုးလာဖို့အာဟာရပြည့်ဝပြီး ကောင်းမွန်တဲ့အစာအာဟာရတွေကို စားသုံးရမယ် ဆို တာ က လျို့ဝှက်ချက်တစ်ခုတော့ မဟုတ်ပါဘူး။ ဒါပေမဲ့ ကလေးတွေကို သူတို့ ကြိုက်နှစ်သက်တဲ့ အစားအစာတွေထဲက အာဟာရပြည့်ဝတဲ့ အစားအစာတွေကို ကျွေးမွေးဖို့ဆိုတာ အင်မတန် စဉ်းစားရခက်ပြီးတော့ သင့်ကိုတကယ် စိတ်ရှုပ်စေမှာပါ။ အခုခေတ်ဆိုရင် ကလေးတွေရဲ့ လက်တစ်လှမ်းမှာ အသင့်စား အစားအစာတွေနဲ့ အချိုဓာတ်များလွန်းတဲ့ မုန့်ပဲသရေစာတွေက ကလေးတွေကို စားချင်အောင်ဆွဲဆောင်နေရုံတင် မဟုတ်ဘဲ ကလေးတွေကိုယ်တိုင်ကလည်း အစားအသောက်တွေ အလွန်အမင်းရွေးချယ်လာတာကြောင့် မိဘတွေအနေနဲ့ အာဟာရပြည့်ဝတဲ့ အစားအသောက်တွေ ကို ကျွေးဖို့အတွက် အမြဲလိုလိုအတားအဆီးတွေ ဖြစ်နေပါတယ်။

အဲလိုအခက်အခဲတွေနဲ့ ကြုံတွေ့နေရတဲ့ မိဘတွေအနေနဲ့ ကိုယ့်ရဲ့ချန်ပီယံလေးတွေကို ပြုစုပျိုးထောင်ရာမှာ ကျန်းမာစေရုံမျှမက အရသာလည်းရှိတဲ့ အစားအစာတွေ ကို မည်သို့ကျွေးရမလဲဆိုတဲ့ နည်းလမ်းကောင်းတွေကို ကို ဒေါက်တာဆုနွယ်ဇော်က နေ ရှင်းလင်းပြောပြပေးထားပါတယ်။

Source: Flickr

ဆေးပညာရှုထာင့်ကကြည့်လျှင် ကလေးတွေကို ကျန်းမာစွာကြီးပြင်းလာစေဖို့ ဘာတွေလိုအပ်ပါသလဲ?

တကယ်တမ်းပြောရရင်တော့ကျန်းမာပျော်ရွှင်တဲ့ဘဝရဖို့အတွက် ဘယ်လိုနေထိုင်ရမလဲ ဆိုရင် ပြောစရာတွေ အများကြီးရှိပါတယ်။ ဒါပေမဲ့ အကျဉ်းချုပ်ပြောရမယ်ဆိုရင် ကလေးငယ်တွေကို ကြီးထွားဖွံ့ဖြိုးလာစေဖို့ အတွက် အာဟာရသင့်တင့်မျှတဲ့ အစားအစာရယ် လုံလောက်တဲ့ ကိုယ်လက်လှုပ်ရှားမှု ရယ် ပြီးတော့ အိပ်ရေးဝဝအိပ်ဖို့အထိက လိုအပ်ပါသည်။

ကျန်းမာသွက်လက်သောကလေး တွေဖြစ်လာအောင် ပြုစုပျိုးထောင်တဲ့နေရာမှာ မိဘတွေအနေနဲ့ ဘယ်လိုမျိုး အစားအစာတွေကို ကျွေးမွေးသင့်ပါသလဲ။ ကလေးတွေရဲ့ အာဟာရအင်အား လိုအပ်ချက်တွေက အရွယ်ရောက်ပြီးတဲ့ လူကြီးတွေနဲ့ နှိုင်းယှဉ်ကြည့်မယ်ဆိုရင် ခြားနားနေတာကို တွေ့ရမှာပါ။ အထူးသဖြင့် အသက် ၇ နှစ်ကနေ ၁၂ နှစ် အရွယ်ဟာ ဖွံ့ဖြိုးကြီးထွား နေဆဲကာလတွေ ဖြစ်ပါတယ်။

Source: Shutterstock

မြန်မာနိုင်ငံက မိဘတွေနဲ့ အရွယ်ရောက်ပြီးသူ အများစုဟာ ်ထမင်းနဲ့ခေါက်ဆွဲလိုမျိုး ကစီဓာတ်ပါဝင်တဲ့ အစားအသောက်တွေ စားတာဟာ သူတို့ရဲ့ ကလေးတွေ တစ်နေ့တာ ဖြတ်သန်းဖို့အတွက် လုံလောက်တဲ့ အာဟာရ အင်အားတွေကို ရမယ်လို့ ယုံကြည်ကြပါတယ်။ ဒါပေမဲ့ကစီဓာတ်ပါတဲ့ အစားအစာတွေက အချိန်အတိုင်းအတာတစ်ခု အထိသာပေးစွမ်းနိုင်ပြီး ကလေးတွေ ကျောင်းမှာ အားကစား ပြုလုပ်တဲ့အခါ မှာပဲဖြစ်ဖြစ် ရှည်လျားတဲ့ ကျောင်းတက်ရက်တွေအတွက် လိုအပ်တဲ့ အာဟာအင်အားရကို ကြာရှည်စွာ ထိန်းသိမ်းပေးနိုင်တာမျိုး မတွေ့ရပါဘူး။

ကလေးတွေအတွက် ကစီဓာတ်က မရှိမဖြစ်လိုအပ်တဲ့ အစာအုပ်စု ၅ ခု မှာပါဝင်သလို အာဟာရသင့်တင့် မျှတတဲ့ အစားအသောက်တွေကို လည်း အချိုးကျမျှတစွာ စားသင့်ပါတယ်။ အဲဒီအစာအုပ်စုတွေကတော့ ကစီဓာတ်၊ အသားဓာတ်၊ နို့နဲ့နို့ထွက်ပစ္စည်းတွေ၊ အသီးနဲ့ဟင်းသီးဟင်းရွက်တွေ၊ အဆီ
နဲ့ သကြားတွေပဲ ဖြစ်ပါတယ်။

Source: Pixabay

ဗီတာမင်နှင့် သတ္ထုဓာတ်တွေကလည်း ကလေးတွေ ဖွံ့ဖြိုးဖို့အတွက် မရှိမဖြစ် လိုအပ်ပါတယ်။ ကယ်လ်စီယမ် ဓာတ် ဟာ ကလေးတွေရဲ့ သွားတွေနဲ့ အရိုးတွေ ဖွံ့ဖြိုး သန်မာဖို့အတွက် အကူအညီပေးပြီးတော့ သံဓာတ်ကိုတော့ ခန္ဓာကိုယ်အနှ့ံ့ အောက်ဆီဂျင်တွေ ကို အလှည့်ကျ သယ်ပို့ပေးနေတဲ့ သွေးဆဲလ်တွေ ဖြစ်ပေါ်လာဖို့အတွက် လိုအပ်ပါတယ်။ ဗီတာမင် B1 နဲ့ B2 တို့က သကြားနဲ့အခြား ကစီဓာတ်တွေကိုစွမ်းအင် အဖြစ်ကို ပြောင်းလဲပေး ရုံမျှမက စွမ်းအင်အဆင့်တွေ တိုးမြှင့်စေဖို့ နဲ့ ကျန်းမာတဲ့ ဇီဝဖြစ်စဉ် ဖြစ်ပေါ်လာဖို့လည်း အရေးပါတဲ့ အခန်းကဏ္ဍမှာ ပါပါတယ်။

မိဘတွေအနေနဲ့ အဲလိုအာဟာရသင့်တင့်မျှတတဲ့ အစားအသောက်တွေကို ဘယ်လိုစီမံနိုင်ပါသလဲ။ အဓိကသော့ချက်ကတော့ အစာအုပ်စု ၅ ခုမှာ ပါဝင်တဲ့ အစားအစာတွေကို သင့်တင့်မျှတစွာကျွေးနိုင်ဖို့ပဲ ဖြစ်ပါတယ်။

Source: Georgia Asian Times

ထမင်း၊ ခေါက်ဆွဲ၊ ဂံျု၊ အာလူး နဲ့အဲဒါတွေကနေ ထုတ်လုပ်ထားတဲ့ အစားအစာတွေတဆင့် ကလေးတွေအတွက် လိုအပ်တဲ့ ကစီဓာတ်တွေကို ရရှိနိုင်ပါတယ်။ အသားဓာတ်ကိုတော့ အမျိုးမျိုးသော အသား၊ ငါး၊ ပုစွန်၊ နို့၊ ဥအမျိုးမျိုး နဲ့ ပဲတွေကနေ ရနိုင်ပြီးတော့ နို့နဲ့နို့ထွက်ပစ္စည်းတွေက ကလေးတွေ အတွက် ကယ်လ်စီယမ်ဓာတ်ကို ပေးနိုင်ပါတယ်။

ခန္ဓာကိုယ်ကြီးထားဖွံ့ဖြိုးဖို့အတွက် ကိုလက်စထရောဓာတ်ကလည်း အရေးကြီးပါသည်။ မိဘတွေအနေနဲ့ ကလေးတွေကို ကျန်းမာရေးနဲ့မညီမညွတ်တဲ့ ပြည့်ဝဆီအစား ကောင်းမွန်တဲ့မပြည့်ဝဆီ ကို လုံလုံလောက်လောက် ရရှိအောင် ကျွေးမွေးသင့်ပါသည်။ မပြည့်ဝဆီတွေကတော့ သံလွင်ဆီ၊ ထောပတ်ဆီ နှင့် ဟင်းသီးဟင်းရွက်မှ ထုတ်လုပ်ထားတဲ့အဆီများဖြစ်ပြီး အဆီများလွန်းတဲ့ အသားနဲ့စားအုန်းဆီပါဝင်တဲ့ အစားအစာတွေမှာ တော့ ပြည့်ဝဆီတွေ ပါဝင်တတ်ပါတယ်။

Source: womensweekly.com.sg

ကလေးတွေအတွက် ရေဓာတ်ကောင်းကောင်း ရရှိဖို့လည်းပဲ လိုအပ်ပါသေးတယ်။ ဥရောပအစားအစာ အန္တရာယ်ကင်းရှင်းရေး အာဏာပိုင်အဖွဲ့(EFSA)ရဲ့ လေ့လာတွေ့ရှိချက်အရ အသက် ၄နှစ်မှ ၁၃နှစ် အထိ ကလေးတွေ ဟာ သူတို့အသက်အပိုင်းအခြားအလိုက် တစ်ရက်မှာ အရည် ၆ခွက်မှ ၈ ခွက်အထိ သောက်သုံးပေးဖို့လိုအပ်ပါတယ်။ (ဥပမာ အသက် ၄နှစ်အရွယ်ကလေးငယ်တစ်ယောက် က အရည် ၁၅၀မီလီလီတာ နှင့် ၄နှစ်နှင့် အထက် ကလေးတွေကတော့ ၂၅၀ မီလီလီတာရရှိ ဖို့ လိုအပ်ပါတယ်။)

အားကစားနဲ့ပတ်သက်ပြီး ကလေးတွေကြီးထွားဖွံ့ဖြိုးဖို့အတွက် သွက်လက်လှုပ်ရှားခြင်း နဲ့ အားကစားက ဘာ့ကြောင့် အရေးကြီးပါသလဲ။

ကလေးတွေ ကြီးထွားမှုနဲ့ ခန္ဓာကိုယ်ဖွံ့ဖြိုးမှုကို လှုံဆော်ပေးဖို့ ကိုယ်လက်လှုပ်ရှားလေ့ကျင့်ခန်းတွေကို နေ့စဉ် ပြုလုပ်ပေးဖို့ လိုအပ်ပါတယ်။ လေ့ကျင့်ခန်းပြုလုပ်ခြင်းဟာ ခန္ဓာကိုယ်ဒြပ်ထု ဖွဲ့စည်းမှုကို မှန်ကန်စေပြီး ကလေးတွေရဲ့ ခန္ဓာကိုယ် ကျန်းမာသန်စွမ်းစေဖို့အတွက် အကျိုးသက်ရောက်မှု ရှိတဲ့ ကိုယ်နေဟန်ထား မှန်မှန်ရှိ စေဖို့အတွက် ထိန်းသိမ်းပေးတဲ့အပြင် ရုပ်ပိုင်းဆိုင်ရာ စိတ်ပိုင်းဆိုင်ရာ ဖိအားတွေ အပေါ်ခံနိုင်ရည်စွမ်းကိုလည်း တိုးစေပါတယ်။

Source: Eddie Two Hawks – WordPress.com

ဆေးဘက်ဆိုင်ရာသုတေသီတွေရဲ့ ထွက်ဆိုချက်တွေအရ သွက်လက်လှုပ်ရှားမှုရှိတဲ့ ကလေးတွေဟာ သွေးတိုးရောဂါ၊ ဆီးချိုရောဂါ၊ အူမကြီးကင်ဆာ၊ အဝလွန်ရောဂါနဲ့ နှလုံးသွေးကြောကျဉ်းရောဂါ များကို ခံစားနိုင်ရခြေ နည်းပါးတာကိုလည်း ရှာဖွေတွေ့ရှိခဲ့ပါတယ်။ဒါ့ကြောင့် ငယ်စဉ်ကတည်းက သွက်လက်တဲ့ လူနေမှုပုံစံကို တည်ဆောက်ပေးခဲ့မယ်ဆိုရင် ကလေးတွေ ကြီးပြင်းလာသည့်အခါ ပိုမိုကောင်းမွန်ကျန်းမာတဲ့ အနာဂတ်ကို ပိုင်ဆိုင်နိုင်မှာပဲ ဖြစ်ပါတယ်။

ကိုယ်လက်လှုပ်ရှားမှုနဲ့အားကစားပြုလုပ်တာက ကလေးတွေရဲ့ ခန္ဓာကိုယ် ဇီဝဖြစ်စဉ်ပြောင်းလဲမှုနှုန်း ကို မြင့်မားစေပါတယ်။ ဇီဝဖြစ်စဉ်ဆိုတာက စဉ်းစားတွေးခေါ်မှုမှ စပြီး ကြီးထွားဖွံ့ဖြိုးစေဖို့ လိုအပ်တဲ့ အာဟာရ အင်အားကို အစားအစာမှ တစ်ဆင့် လောင်စာအဖြစ်ပြောင်းလဲပေးတဲ့ ဖြစ်စဉ်တစ်ခုဖြစ်ပါတယ်။ ပြဿနာ အကြောင်းအရာ တစ်ခုကို ကိုင်တွယ်ဖြေရှင်းရာမှာ အာရုံစူးစိုက်မှုကို ကူညီပေးတဲ့ သွေးထဲက adrenaline ဓာတ်ကို တိုးစေတဲ့အတွက်ကြောင့် စဉ်းစားတွေးခေါ်နိုင်မှုနှုန်း ကို မြန်ဆန်စေပါတယ်။ ဘဝကို ရိုးရိုးရှင်းရှင်း ပျော်ရွှင်စွာ နဲ့ စိတ်ဖိစီးမှု ကင်းကင်းနေထိုင်နိုင်ဖို့ ကူညီပေးတဲ့ endorphins ကို ဦးနှောက်က ထုတ်ပေးစေဖို့အတွက် အားကစားပြုလုပ်ခြင်းက အကူအညီပေးပါတယ်။

Source: twitter.com

ကျန်းမာပျော်ရွှင်တဲ့ ဘဝနေထိုင်မှုပုံစံရရှိဖို့ အတွက် နောက်ဆုံးကျန်တဲ့ အချက်ကတော့ လုံလောက်ကောင်းမွန်တဲ့ အိပ်စက်မှု ကို ရဖို့ပါပဲ။ ကလေးတွေအတွက် လုံလောက်တဲ့အိပ်စက်မှုတစ်ခု ကို ရစေဖို့ နဲ့ လုံလောက်မှုရှိမရှိကို ဘယ်လို သိရှိနိုင်ပါသလဲ။

ဗြိတိန်နိုင်ငံအခြေစိုက် Millpond Children က Sleep Clinic ရဲ့အချက်အလက်တွေအရ ကလေးတွေရဲ့ ခန္ဓာကိုယ် ဖွံ့ဖြိုးဆဲကာလဖြစ်တဲ့ အသက် ၇ နှစ် မှ ၁၂ နှစ် ကြား ကလေးတွေအတွက် တစ်ရက်မှာ အိပ်စက်ချိန် အနည်းဆုံး ၉ နာရီရှိသင့်ပါတယ်။ အဲဒီ အသက်အပိုင်းအခြားမှာရှိတဲ့ကလေးတွေအတွက် အကောင်းဆုံး အိပ်ချိန်ပမာဏ ဟာ အများဆုံး ၁၁နာရီဖြစ်ပါတယ်။

ကလေးတွေအတွက် လုံလောက်ကောင်းမွန်တဲ့အိပ်စက်မှုကို ရရှိစေဖို့အတွက် ကလေးတွေအိပ်စက်တဲ့နေရာ မှာ တိတ်ဆိတ်ခြင်းကို အနှောင့်အယှက်ပေးနိုင်တဲ့ ဆူညံသံတွေမရှိစေဘဲ အေးချမ်းဆိတ်ငြိမ်ပြီး အလင်းရောင်လျော့နေဖို့ ကို မိဘတွေအနေနဲ့ ဂရုတစိုက်စောင့်ကြည့်ပေးဖို့ လိုအပ်ပါတယ်။ နေ့လည် နေ့ခင်း ဒါမှမဟုတ် ညဘက် မအိပ်စက်ခင်မှာ ဗိုက်ဆာတာမျိုးမဖြစ်စေဖို့ အာဟာရရှိပြီး လုံလောက်တဲ့ အစားအစာတွေ ကျွေးမွေးပြီးမှ အိပ်စက်စေဖို့လည်း အထူးဂရုစိုက်ပေးသင့်ကြောင့် ပြောပြချင်ပါတယ်။

Featured Image Source: kashmirobserver.net