ခန္ဓာကိုယ်ကျန်းမှာမှ စိတ်လည်းကျန်းမာမှာဖြစ်သလို စိတ်ကျန်းမာမှလည်း ခန္ဓာကိုယ်ကလည်း ကျန်းမာနိုင်မှာပါ။ ရုပ်ပိုင်းဆိုင်ရာကျန်းမာရေးကို မြှင့်တင်ပေးနိုင်ဖို့ ၊ အာဟာရဖြစ်စေဖို့နဲ့ ခွန်အားဖြစ်စေဖို့က အလေ့အကျင့်တချို့ကို နေ့တိုင်းလုပ်ပေးရုံနဲ့တင် ခန္ဓာကိုယ်ကျန်းမာစေတာမလို့ နေ့စဉ်နေ့တိုင်း လုပ်ပေးသင့်တဲ့ အလေ့အကျင့်တချို့ကို ဝေမျှပေးလိုက်ပါတယ်။

1. လှုပ်လှုပ်ရှားရှားနေပါ

လေ့ကျင့်ခန်းပုံမှန်လုပ်ပေးတာက စိတ်ခံစားချက်ကို မြှင့်တင်ပေးနိုင်သလို ဦးနှောက်လုပ်ဆောင်ချက်ကိုလည်း မြှင့်တင်ပေးနိုင်ပါတယ်။ နှလုံးကျန်းမာရေးကို မြှင့်တင်ပေးတာ ၊ ကောင်းကောင်းအိပ်ပျော်စေတာ ၊ နာတာရှည်ရောဂါဖြစ်နိုင်ခြေကို လျှော့ချပေးနိုင်တာတွေက ကိုယ်လက်လှုပ်ရှားမှုရဲ့ အကျိုးကျေးဇူးတွေပါပဲ။

ဒါကြောင့် ကိုယ်ခံစွမ်းအားကို တိုးစေဖို့ တစ်နေ့ကို ၁၅ မိနစ်လောက်အချိန်ပေးပြီး ကိုယ်လက်လှုပ်ရှားမှုလုပ်ပေးပါ။ ဒါမှမဟုတ် ပေါ့ပေါ့ပါးပါးလမ်းလျှောက်ပါ။ ပုံမှန်အလေ့အကျင့်အဖြစ် လုပ်ပေးပါ။

2. အစားအသောက်ကို မျှတအောင် စားပါ

ခန္ဓာကိုယ်ကျန်းမာဖို့အတွက် မှန်ကန်တဲ့အာဟာရဓာတ်တွေကလည်း မရှိမဖြစ်လိုအပ်ပါတယ်။ သစ်သီးများ၊ ဟင်းသီးဟင်းရွက်များ၊ ပရိုတင်းများနဲ့ ကျန်းမာရေးနဲ့ ညီညွတ်တဲ့အဆီတွေကို မျှမျှတတစားပေးပါ။ ဒီလို အစားအသောက်ကို မျှတအောင် စားတာကလည်း နာတာရှည်ရောဂါဖြစ်နိုင်ခြေကို လျှော့ချပေးနိုင်ပြီး အသက်ရှည်စေကာ စိတ်ခံစားချက်နဲ့ စွမ်းအင်အဆင့်ကို မြှင့်တင်ပေးနိုင်ပါတယ်။

3. ရေဓာတ်ရှိနေပါစေ

ရေဓာတ်ပြည့်ဝနေဖို့က ကျန်းမာရေးကောင်းဖို့အတွက် မရှိမဖြစ် အစိတ်အပိုင်းတစ်ခုပါ။ အစာခြေဖို့ ၊ ခန္ဓာကိုယ်အပူချိန်ကို ထိန်းသိမ်းဖို့ ၊ အညစ်အကြေးနဲ့ အဆိပ်အတောက်များကို ဖယ်ရှားဖို့ အဓိကအခန်းကဏ္ဍကနေပါသလို စိတ်ပိုင်းဆိုင်ရာ ကြည်လင်မှု၊ ကျန်းမာတဲ့ အသားအရေနဲ့ ကိုယ်အလေးချိန် ထိန်းညှိဖို့အတွက်လည်း အထောက်အကူဖြစ်စေပါတယ်။

ရေဓာတ်မပြည့်ဝတဲ့အခါ ခေါင်းကိုက်တာ ၊ ပင်ပန်းနွမ်းနယ်တာ ၊ ရေပြားခြောက်သွေ့တာတွေ ဖြစ်တတ်ပါတယ်။ ဒါကြောင့် တစ်နေ့လျှင် အနည်းဆုံး ရေ 2 လီတာ မဖြစ်မနေသောက်ပေးပါ။ သွားလေရာရာကို ရေသန့်ဘူးယူသွားပါ ။

4. လုံလုံလောက်လောက်အိပ်ပါ

အိပ်ရေးဝဖို့ ၊ အိပ်ချိန်လုံလောက်ဖို့ကလည်း ပုံမှန်လေ့ကျင့်ခန်းလုပ်တာ ၊ အာဟာရပြည့်ဝတဲ့ အစားအစာစားဖို့တွေလိုမျိုး အရေးကြီးပါတယ်။ ကောင်းမွန်စွာအိပ်စက်ခြင်းက စိတ်ခံစားချက်ကို မြှင့်တင်ပေးပြီး ခုခံအားစနစ်ကို မြှင့်တင်ပေးပါတယ်။ ဒါ့အပြင် ဦးနှောက်လုပ်ဆောင်ချက်ကို ထက်မြက်စေပြီး ကိုယ်အလေးချိန်ကိုလည်း ထိန်းပေးနိုင်ပါတယ်။ အိပ်ရေးပျက်တာများရင် နှလုံးရောဂါ၊ အဝလွန်ခြင်းနဲ့ ဆီးချိုရောဂါတို့လို ရောဂါတွေကိုဖြစ်စေပြီး စိတ်ကျန်းမာရေးကိုပါ ထိခိုက်စေပါတယ်။

ဒါကြောင့် ညတိုင်း ပုံမှန်အိပ်ချိန်ဇယားကို သတ်မှတ်ပြီး အိပ်ချိန်ကို ဦးစားပေးပါ။ ကောင်းကောင်းအိပ်ပျော်ဖို့အတွက် အထောက်အကူဖြစ်အောင် အိပ်ခါနီး စာအုပ်ဖတ်တာ ၊ စိတ်အေးလက်အေး သီချင်းနားထောင်တာ ၊ ရေနွေးနွေးနဲ့ရေချိုးတာတို့ကို လုပ်ပေးပါ။ အိပ်ရာမဝင်ခင် ဖုန်းသုံးတာ ကွန်ပျုတာသုံးတာတို့ကို ရှောင်ပါ။

5. အရက် ၊ ဆေးလိပ်သောက်ခြင်းကို ရှောင်ကြဉ်ပါ

အရက်အလွန်အကျွံသောက်တာက အသည်းပျက်စီးတာနဲ့ တချို့သောကင်ဆာများကို ဖြစ်စေနိုင်ပြီး စိတ်ကျန်းမာရေးကို ထိခိုက်စေနိုင်သလို ဆေးလိပ်သောက်တာကလည်း အဆုတ်ကင်ဆာနဲ့ နှလုံးရောဂါ အပါအဝင် ရောဂါအမျိုးမျိုး ဖြစ်နိုင်ခြေကို တိုးစေပါတယ်။ ဒါကြောင့် အရက် ၊ ဆေးလိပ်သောက်ခြင်းကို အတတ်နိုင်ဆုံး ရှောင်ကြဉ်ပါ။

6. ပုံမှန်ကျန်းမာရေးစစ်ဆေးပါ

ပုံမှန်ကျန်းမာရေးစစ်ဆေးတာကို အများစုက မလိုအပ်ဖူးလို့ထင်ကြပေမယ့် အမှန်တကယ်က ရောဂါများကိုကာကွယ်ဖို့နဲ့ ဖြစ်နိုင်ခြေရှိတဲ့ပြဿနာများကို စောစီးစွာသိနိုင်ဖို့ အဓိကသော့ချက်ပါပဲ။ ဒါကြောင့် သွေးစစ်ဆေးမှု ၊ သွေးပေါင်ချိန် စတာတို့ကို ပုံမှန်စစ်ဆေးပြီး တခြားကြိုတင်ကာကွယ်စစ်ဆေးမှုများကိုလည်း လုပ်ပေးသင့်ပါတယ်။