ဝမ်းချုပ်ရင် ခေါင်းကိုက်တာ၊ ကိုယ်လက်လေးလံတာတို့ ဖြစ်တတ်ပြီး နေရထိုင်ရတာ သက်တောင့်သက်သာဖြစ်မှာမဟုတ်ပါဘူး။

အဲ့ဒီအပြင် မျက်နှာမှာလည်း အသားအရေ မကောင်းတာ၊ ဝက်ခြံထွက်တာတွေဖြစ်စေနိုင်ပါတယ်။

ဝမ်းချုပ်တယ်ဆိုတာ

ဝမ်းချုပ်တာက ကိုယ်စားသုံးလိုက်တဲ့ အစားအသောက်အပေါ်လည်း မူတည်နေပါတယ်။ ကိုယ်စားသုံးတဲ့အစားအစာမှာ အမျှင်ဓာတ်ပါဝင်မှုအပေါ် မူတည်နေပါတယ်။

ဘယ်လို အစားအစာတွေက ဝမ်းချုပ်စေသလဲ

နို့ထွက်ပစ္စည်းတွေ

နို့ထွက်ပစ္စည်းတွေဖြစ်တဲ့ နွားနို့၊ ဒိန်ချဉ်၊ ချီစ်၊ ရေခဲမုန့်တို့ကို အမြောက်အမြား စားသုံးရင် ဝမ်းချုပ်တာတွေကို ဖြစ်စေနိုင်ပါတယ်။

ချီစ်စားသုံးတာများတဲ့ အရွယ်ရောက်ပြီးသားသူတွေမှာ ဝမ်းချုပ်တာတွေ ဖြစ်တတ်ပါတယ်။

ဒါပေမယ့် နို့ထွက်ပစ္စည်းတွေမှာ ကျန်းမာရေး အကျိုးကျေးဇူးတွေ အများကြီးရှိတာကြောင့် စားသင့်ပြီး အလွန်အကျွံမစားဖို့နဲ့ အမျှင်ဓာတ်ပါဝင်တဲ့ အစားအစာတွေနဲ့ တွဲလျက်စားသုံးဖို့ လိုပါတယ်။

အနီရောင်ရှိတဲ့ အသားတွေ

အနီရောင်ရှိတဲ့ အသားတွေဖြစ်တဲ့ အမဲသား၊ဝက်သား စတာတွေကို စားသုံးတာများရင်လည်း ဝမ်းချုပ်တတ်ပါတယ်။ သူတို့မှာ အဆီဓာတ်ပါဝင်မှုများပြီး အစာကြေဖို့လည်း ခက်ခဲပါတယ်။ သူတို့မှာပါဝင်တဲ့ ပရိုတင်း အမျှင်ဓာတ်တွေက အစာကြေဖို့ခက်ခဲပြီး ပါဝင်တဲ့ သံဓာတ်တွေကလည်း ဝမ်းချုပ်စေတတ်ပါတယ်။ ဒါကြောင့် အလွန်အကျွံစားသုံးတာမျိုးမလုပ်ဘဲ အသီးအရွက်တွေနဲ့ တွဲပြီး စားသုံးသင့်ပါတယ်။

ကြက်ဥ၊ဘဲဥ

ကြက်ဥ၊ဘဲဥတို့က တခါတလေ သူ့ချည်းဘဲ စားတာများသွားရင် ဝမ်းချုပ်တတ်ပါတယ်။ အသားတွေလိုဘဲ သူတို့မှာ ပရိုတင်းဓာတ်တွေ ပါဝင်မှုများတာကြောင့်ပါ။ ကြက်ဥ၊ ဘဲဥအစား ပဲတွေကိုလည်းစားသုံးလို့ရပါတယ်။ သူတို့မှာ ပရိုတင်းဓာတ်ပါဝင်မှုများတဲ့အပြင် အမျှင်ဓာတ်တွေလည်းပါဝင်ပါတယ်။ ကြက်ဥ၊ဘဲဥကိုလည်း အရွက်တွေ၊ အသီးတွေနဲ့ တွဲစားလို့ရပါတယ်။

ချောကလက်

ချောကလက်မှာ အဆီဓာတ်တွေပါဝင်မှုများတာကြောင့် အစာခြေစနစ်ကို နှောင့်နှေးစေပြီး ဝမ်းချုပ်နိုင်ပါတယ်။