ကြမ်းတမ်းနေတဲ့လက်တွေနူးညံ့ပြီး ဂျီးတွေသန့်စင်သွားစေမယ့် နည်းလမ်းနှစ်မျိုး

မိန်းကလေးပဲဖြစ်ဖြစ်၊ ယောကျ်ားလေးပဲဖြစ်ဖြစ် လက်ကြမ်းနေတာမျိုးတွေ၊ ဂျီးတက်နေတာမျိုးတွေ ဖြစ်တတ်ပါတယ်။ ဒီလိုဖြစ်တာတွေသက်သာစေဖို့ အိမ်မှာပဲ ကိုယ်တိုင်ပြုလုပ်လို့ရမယ့် အိမ်တွင်းဖြစ်နည်းလမ်းတွေ အများကြီးရှိပါတယ်။ အဲ့ဒီထဲကမှ လူတိုင်းအတွက် လုပ်ရတာအဆင်ပြေပြီး လွယ်ကူစေမယ့် နည်းလမ်းနှစ်မျိုးကို ရွေးချယ်ပေးလိုက်ပါတယ်။

သံလွင်ဆီနဲ့ ဆား

သံလွင်ဆီနဲ့ ဆားကတော့ အိမ်တိုင်းမှာရှိမှာပါ။ ဆားကိုတော့ ဟင်းချက်တဲ့ဆားမသုံးပဲ ဆားကြမ်းတွေ၊ ပင်လယ်ဆားတွေကို သုံးပေးပါ။

ပြုလုပ်ရမယ့်ပုံစံကတော့ သံလွင်ဆီ – စားပွဲတင်ဇွန်းတစ်ဇွန်းကို ဆား – လက်ဖက်ရည်ဇွန်းတစ်ဝက်နဲ့ ရောပြီး ကြမ်းတမ်းနေတဲ့လက်နဲ့ ချေးတက်နေတဲ့ လက်နေရာတွေမှာ အသာလေးပွတ်ပေးပါ။ ပြီးရင်တော့ ရေဆေးချပြီး Hand Cream (သို့) Lotion လိမ်းပေးလိုက်ပါ။ ဒီလိုလုပ်ပေးခြင်းက ကြမ်းတမ်းနေတဲ့လက်တွေကို နူးညံ့လာစေပြီး လက်မှာရှိနေတဲ့ ချေးတွေကိုလည်း သန့်စင်သွားစေပါတယ်။ တစ်ပတ်ကို တစ်ကြိမ်ပြုလုပ်ပေးပါ။

ပဲမှုန့်နဲ့ ရှားစောင်းလတ်ပတ်

ပဲမှုန့်နဲ့ ရှားစောင်းလတ်ပတ်ကတော့ အိမ်တိုင်းမှာမရှိတောင် ရှာရတာလွယ်ကူပါတယ်။

ပြုလုပ်ရမယ့်ပုံစံကတော့ ပဲမှုန့် – လက်ဖက်ရည်ဇွန်းတစ်ဝက်ကို ရှားစောင်းလတ်ပတ်ဂျယ်လ် – စားပွဲတင်ဇွန်းတစ်ဇွန်းစာနဲ့ ရောမွှေပြီး လက်မှာပွတ်လိမ်းပေးရပါမယ်။ ပွတ်မလိမ်းခင်မှာ လက်ကိုရေအရင်စွတ်ပေးထားဖို့ လိုပါတယ်။ ဒီလိုလုပ်ပေးတာကလည်း ကြမ်းတမ်းနေတဲ့လက်တွေကို နူးညံ့လာစေပြီး လက်မှာရှိနေတဲ့ ချေးတွေကိုလည်း သန့်စင်သွားစေပါတယ်။

အခုပြောပြပေးသွားတဲ့ နည်းလမ်းနှစ်မျိုးထဲက ကိုယ်နဲ့အဆင်ပြေတာတစ်ခုကို ရွေးချယ်ပြုလုပ်နိုင်ပါတယ်။ အားလုံးပဲကျန်းမာလှပပြီး နူးညံ့တဲ့ လက်လေးတွေကို ပိုင်ဆိုင်နိုင်ကြပါစေနော်။

Photo Source: www.womensok.com