လေဖြတ် ရောဂါဟာ ဦးနှောက် ကို သွေးစီးဆင်းမှု ရပ်ဆိုင်း သွားခြင်း ဒါမှမဟုတ် လျော့နည်း သွားခြင်း တွေကြောင့် ဖြစ်ပေါ်လာတဲ့ ရလဒ်တစ်ခုပဲဖြစ်ပါတယ်။ လေဖြတ်ရောဂါဟာ အမေရိကန်ပြည်ထောင်စုမှာ လူသေဆုံးမှုအများဆုံး ၅ ခုမြောက်ရောဂါတစ်မျိုးဖြစ်ပါတယ်။ လေဖြတ်ရောဂါဖြစ်နေပြီဆိုတာကို ကြိုတင်သိရှိနိုင်ဖို့ လေဖြတ်ရောဂါရဲ့ ရှေးပြေးလက္ခဏာရပ်တွေကို မျှဝေပေးချင်ပါတယ်။
လူ့ခန္ဓာကိုယ်ရဲ့ အရေးကြီးဆုံးဖြစ်တဲ့ ဦးနှောက်ရဲ့ လုပ်ဆောင်မှုတွေ ပုံမှန်ဆောင်ရွက်နိုင်ဖို့ လုံလောက်တဲ့သွေး ပမာဏမရရှိဘူးဆိုရင် ဦးနှောက် အစိတ်အပိုင်းနဲ့ သက်ဆိုင်တဲ့ ခန္ဓာကိုယ် အစိတ်အပိုင်းရဲ့ လုပ်ငန်းတွေ ရပ်ဆိုင်းသွားပြီး လေဖြတ် ရောဂါလက္ခဏာရပ်တွေ ပေါ်ပေါက်လာရတာပါ။
အမြင်အာရုံဝေဝါးခြင်း
ရုတ်တရက် မျက်လုံးတစ်ဖက်တည်း (သို့) မျက်လုံးနှစ်ဖက်လုံး အမြင်အာရုံေ၀ဝါးတာ နှစ်ထပ်မြင်တာမျိုးတွေဖြစ်တတ်ပါတယ်။ ရုတ်တရက် ဝါးသွားတာ မှောင်မဲသွားတာမျိုး ကြည့်ရတာ လက်ခဲတာမျိုးဖြစ်တတ်ပါတယ်။
ဒယိမ်းဒယိုင်ဖြစ်ခြင်း
ရုတ်တရက် ခန္ဓာကိုယ်ကို ဟန်ချက်ညီအောင် ထိန်းချုပ်နိုင်မှုမရှိခြင်း လမ်းလျှောက်တာမမှန်တော့ခြင်းမျိုးတွေဖြစ်တတ်ပါတယ်။ လမ်းလျှောက်ရင် ဒယိမ်းဒယိုင်ဖြစ်လာပြီဆိုရင် မပေါ့သင့်ပါဘူး။
စကားပြောဖို့ခက်ခဲလာခြင်း
ရုတ်တရက် စကားပြောဖို့ခက်ခဲခြင်း၊ စကားလုံးမပီသခြင်းတို့ဖြစ်တတ်ပါတယ်။ ဒါဟာ လေဖြတ်ရောဂါဖြစ်နိုင်တဲ့ ၇၂% ရှိတာမို့ ဒီလိုဖြစ်လာပြီဆိုရင် ဆရာဝန်နဲ့အမြန်ဆုံးတိုင်ပင်သင့်ပါတယ်။
လက် (သို့) ခြေထောက်အားနည်းခြင်း
ခြေထောက်(သို့) လက်မှာ အားနည်းလာတာမျိုးဖြစ်တတ်ပါတယ်။ ဒါမှမဟုတ် ခြေတစ်ဖက် ထုံတာ လက်ထုံတာ မျက်နှာထုံတာမျိုးလည်း ဖြစ်နိုင်ပါတယ်။
ရုတ်တရက်နာကျင်ခြင်း
နာကျင်တာဟာလည်း လေဖြတ်ရောဂါနဲ့စပ်ဆက်နေပါတယ်။ လက်မောင်း၊ ခြေထောက် ရုတ်တရက်နာကျင်တာ (သို့) မျက်နှာတစ်ခြမ်း (သို့) ရင်ဘတ်တစ်ခြမ်းရုတ်တရက်နာကျင်တာမျိုးဖြစ်နိုင်ပါတယ်။
စိတ်ပိုင်းဆိုင်ရာ ပြောင်းလဲမှုဖြစ်ခြင်း
ဒီလက္ခဏာရပ်က အမျိုးသမီးတွေမှာ အများအားဖြင့်ဖြစ်တတ်ပါတယ်။ စိတ်ပိုင်းဆိုင်ရာ လက္ခဏာရပ်တွေ ခံယူချက်တွေ ရုတ်တရက် ပြောင်းလဲသွားတာမျိုးဖြစ်ရင် ဆရာဝန်နဲ့ တိုင်ပင်သင့်ပါတယ်။
ရုတ်တရက် ခေါင်းကိုက်ခြင်း
ရုတ်တရက် အကြောင်းပြချက်မဲ့ ခေါင်းအပြင်းအထန်ကိုက်တာကလည်း လေဖြတ်နိုင်တဲ့ လက္ခဏာရပ်တစ်ခုပါပဲ။ ဒီလိုမကြာခဏဖြစ်ရင် မပေါ့ဆသင့်ပါဘူး။
မျက်နှာထုံခြင်း
ရုတ်တရက် မျက်နှာထုံနေပြီဆိုရင်လည်း လေဖြတ်နိုင်ပါတယ်။ ပြုံးလိုက်တဲ့အခါမှာ မျက်နှာတစ်ခြမ်းက လုံးဝမရွှေ့ဘဲဖြစ်နေတယ်ဆိုရင် ဆေးရုံ ဆေးခန်းအမြန်ဆုံးသွားသင့်ပါတယ်။ မျက်ခွံ နဲ့ မျက်နှာကြွက်သားတို့ ဆတ်ကနဲ့ ဆတ်ကနဲ့ တွန့်တာမျိုးလည်း ဖြစ်တတ်ပါတယ်။
ပင်ပန်းနွမ်းနယ်ခြင်း
လေမဖြတ်ခင် ရက်သတ္တပတ်အနည်းငယ်အလိုမှာ ပင်ပန်းနွမ်းနယ်တာမျိုးဖြစ်နိုင်ပါတယ်။ ရုတ်တရက် အကြောင်းပြချက်မဲ့ ပင်ပန်းတာမျိုး၊ အားနည်းတာမျိုးဖြစ်တတ်ပါတယ်။ လေဖြတ်ပြီးနောက်ပိုင်းလည်း ပင်ပန်းနွမ်းနယ်နေတာမျိုး ဖြစ်ပါတယ်။
ရုတ်တရက် ကြို့ထိုးခြင်း
ရုတ်တရက် ကြို့ထိုးတာကလည်း အသေးအမွှားဆိုပေမဲ့ လေဖြတ်တဲ့လက္ခဏာရပ်ထဲမှာ တစ်ခုအပါအဝင်ဖြစ်ပါတယ်။ အထက်မှာဖော်ပြခဲ့တဲ့ လက္ခဏာရပ်တွေအပါအဝင် ကြို့ထိုးမယ်ဆိုရင် လေဖြတ်တဲ့ ရှေးပြေးလက္ခဏာရပ်တစ်ခုဖြစ်ပါတယ်။
ကျန်ရှိတဲ့ လေဖြတ်နိုင်တဲ့ ရှေးပြေးလက္ခဏာရပ်တစ်ချို့ကတော့
ဦးခေါင်း နောက် စေ့မှာ ကိုက်ခဲခြင်း၊ ခြေလက်များ မကြာခဏ ကျဉ်ခြင်း၊ မကြာခဏ ဝမ်းချုပ်ပြီး ဝမ်းဗိုက် လေပွခြင်း၊ ည အိပ်နေရင်း ထုံကျဉ် ပြီး လန့်နိုးခြင်းတို့ဖြစ်ပါတယ်။ ဒါ့အပြင် ခြေတစ်ဖက်ထုံတာ၊ လက်ထုံတာ၊ ရုတ်တရက် သူများပြေားတာကိုနားမလည်တာ၊ ရုတ်တရက်မူးဝေတာ၊ ရုတ်တရက် လမ်းမလျှောက်နိုင်တော့တာမျိုးတွေဖြစ်ပါတယ်။
