သဘာဝနည်းနဲ့စိုက်ထားတဲ့ ဓာတုဆေးဝါးမသုံးဘဲ စိုက်ထားတဲ့ ဟင်းသီးဟင်းရွက်၊ အသီးအနှံတွေက မရှိသလောက်ရှားပါတယ်။
ဓာတုဆေးဝါးတွေသုံးတဲ့ အသီးအနှံ၊ အရွက်တွေကို စားတာများရင်လည်း ကင်ဆာတွေနဲ့တခြား ကျန်းမာရေး ဆိုးကျိုးတွေ ဖြစ်တတ်ပါတယ်။
ဒါကြောင့် အသီးအရွက်တွေမှာရှိတဲ့ ဓာတုဆေးဝါးတွေ ပိုးသတ်ဆေးတွေကို အလွယ်တကူ ဖယ်ရှားနိုင်တဲ့ နည်းလမ်းများကို ဝေမျှချင်ပါတယ်။
သဘာ၀ သန့်စင်ဆေးရည်
သံပုရာရည် လက်ဖက်ရည်ဇွန်း ၁ဇွန်း နဲ့ Baking Soda လက်ဖက်ရည်ဇွန်း ၂ဇွန်းတို့ကိုရောပြီး ရေဖြန်းလို့ရတဲ့ ဗူး (Spray ဗူး)ထဲထည့်ပါ။ အသီးအရွက်တွေကို မစားခင်မှာအဲ့ဒီ Spray ဗူးလေးနဲ့ဖြန်းပေးရင် အသီးအရွက်တွေကို မထိခိုက်ဘဲ ပိုးသတ်ဆေး၊ဓာတုဆေးဝါးတွေကို သန့်စင်စေမှာဖြစ်ပါတယ်။
အခွံခွာပါ
အသီးအနှံတွေဆိုရင် အခွံခွာလိုက်တာနဲ့ ဓာတုဆေးဝါးတွေတော်တော်များများ သန့်စင်ပြီးသားဖြစ်သွားပါတယ်။
အခွံခွာပြီးရင် ရေနွေးပူပူနဲ့ဆေးလိုက်ပါ။
ရှာလကာရည်
ပိုပြီး စင်အောင် ဆေးချင်ရင်တော့ ရှာလကာရည်ကအကောင်းဆုံးပါဘဲ။ ရှာလကာရည် လက်ဖက်ရည်ဇွန်း ၁ ဇွန်းကို ရေနွေးပူပူထည့်ထားတဲ့ခွက်ထဲ ထည့်လိုက်ပါ။ အဲ့ဒီခွက်ထဲမှာ အသီးအရွက်တွေကို ၁ မိနစ်လောက်စိမ်လိုက်ပါ။ ပြီးရင် ရေဆေးလိုက်ပါ။ ဒါဆိုရင် ချက်ပြုတ်စားသောက်လို့ရပါပြီ။
ဆားရည်
ဆားရည်နဲ့လည်း ဓာတုဆေးဝါးတွေ ပြောင်အောင် ဆေးလို့ရပါတယ်။ ပန်းကန်လုံးရဲ့ တစ်ဝက်ကို ရေထည့်ပြီး ဆားလက်ဖက်ရည်ဇွန်း၁ဇွန်းထည့်ကာ မွှေပါ။ မချက်ပြုတ်ခင် ဟင်းသီးဟင်းရွက်တွေကိုအဲ့အထဲမှာ ခဏလောက်စိမ်ထားပါ။ ပြီးရင်ရေဆေးပြီးနောက် ဓာတုဆေးဝါးတွေ ကင်းစင်သွားတာကြောင့် ချက်ပြုတ်စားလို့ရပါပြီ။
