လေ့ကျင့်ခန်းပြုလုပ်ခြင်းဟာ ကျန်းမာရေးနဲ့ညီညွတ်မှုရှိတဲ့ ဘဝတစ်ခုရဲ့ အခြေခံအုတ်မြစ်တစ်ခုပဲဖြစ်ပါတယ်။ သင့်ရဲ့ဆီးချိုရောဂါကိုလည်း ဘယ်လိုမျိုးထိန်းချုပ်နိုင်သလဲဆိုတာအပေါ်မှာ အလွန်အရေးပါပါတယ်။ ဒါကြောင့် ဆီးချိုရောဂါရှိနေပြီဖြစ်စေ၊ ဖြစ်နိုင်ခြေများနေတဲ့ အခြေအနေ ဖြစ်နေပြီဆိုရင်တော့ လေ့ကျင့်ခန်းက ဦးစားပေးအနေနဲ့လိုအပ်လာပါပြီ။
လေ့ကျင့်ခန်းမှန်မှန်လုပ်ပေးခြင်းက ဆီးချိုရောဂါကိုထိန်းချုပ်ခြင်း သို့မဟုတ် တိုက်ဖျက်သည့်အချိန်တွေမှာ ကျန်းမာရေးနဲ့ညီညွတ်စွာ အစားစားသုံးသည် နှင့်အညီ အလွန်အထောက်အကူဖြစ်စေပါတယ်။ ဒါပေမယ့်လည်း ဘယ်လိုလေ့ကျင့်ခန်းတွေက ပိုမိုထိရောက်မှုရှိစေသလဲဆိုတာကို သိရှိဖို့အတွက် အခုပဲဖော်ပြပေးလိုက်ရပါတယ်။
၁။ လမ်းလျှောက်ခြင်း
အသက်အရွယ်အပိုင်းအခြားမရွေး အကောင်းဆုံးနဲ့ အသင့်တော်ဆုံး လေ့ကျင့်ခန်းတစ်ခုဖြစ်ပါတယ်။ သွက်သွက်လက်လက်လမ်းလျှောက်ပေးခြင်းက နှလုံးခုန်နှုန်းကိုမြင့်တက်စေတဲ့ အေရိုးဗစ်လေ့ကျင့်ခန်းတစ်ခုဖြစ်ပြီး တစ်ကိုယ်လုံးကျန်းမာရေးအတွက် အထူးကောင်းမွန်ပါတယ်။
လမ်းစမလျှောက်ခင်မှာ ခြေထောက်ကိုကာကွယ်ဖို့အတွက် အရည်အသွေးကောင်းမွန်ပြီး ကျစ်ကျစ်လစ်လစ်ရှိသည့် အားကစားဖိနပ်တွေကို သေချာစီးပေးပါ။
၂။ Tai Chi
တရုတ်ရိုးရာသိုင်းကစားနည်းတစ်မျိုးဖြစ်ပြီး လေးနက်သည့်အသက်ရှူသွင်း ရှူထုတ်မှုတို့ကို ညင်သာတဲ့လှုပ်ရှားမှုတွေနဲ့ ပေါင်းစပ်ထားပါတယ်။ နာရီဝက်ကျော်ကျော် နှေးကွေးညင်သာသည့်ပုံစံနဲ့ ပြုလုပ်သွားရတာဖြစ်ပါတယ်။ ဆီးချိုဝေဒနာရှင်တွေမှာဖြစ်တတ်တဲ့ အကြောပျက်စီးမှုကို လျော့ကျစေပြီး ဟန်ချက်ညီစေနိုင်တဲ့ လေ့ကျင့်ခန်းဖြစ်ပါတယ်။
၃။ အလေးမ လေ့ကျင့်ခန်း
ဆီးချိုရောဂါ ခံစားနေရသူများ ဤလေ့ကျင့်ခန်းကိုလုပ်ကြည့်ဖို့ စဉ်းစားသင့်ပါတယ်။ ခန္ဓာကိုယ်မှ အင်ဆူလင်ကို တုံ့ပြန်မှုအားပိုကောင်းစေဖို့အတွက် ကူညီပေးပြီး နှလုံးရောဂါဖြစ်ပွားနိုင်ခြေကို လေ ျှာ့ချပေးပါတယ်။ အဆင့် ၂ ဆီးချိုရှင်များအတွက် အလွန်အရေးကြီးသည့် ကြွက်သားသိပ်သည်းမှုကို တည်ဆောက်ဖို့ ကူညီပေးနိုင်တဲ့ လေ့ကျင့်ခန်းတစ်ခုဖြစ်ပါတယ်။
၄။ ရေကူးခြင်း
ဆီးချိုရောဂါသည်များ နေ့စဉ်ပြုလုပ်ရမယ့် လေ့ကျင့်ခန်းများထဲတွင် ထည့်သွင်းသင့်သည့် နောက်ထပ်အေရိုးဗစ်လေ့ကျင့်ခန်းတစ်မျိုးဖြစ်ပါတယ်။ ကိုယ်ခန္ဓာတစ်ခုလုံး ကျစ်လစ်မှုကိုတိုးမြှင့်ပေးခြင်းဖြင့် သွေးချိုပမာဏကို ထိန်းချုပ်ဖို့ ကူညီပေးပါတယ်။ ထို့အပြင် ခန္ဓာကိုယ်အတွင်းမှ အဓိကကြွက်သားများကို သန်မာစေပါတယ်။
၅။ ယောဂ
နည်းလမ်းအမျိုးမျိုးဖြင့် အကျိုးကျေးဇူးများစေတဲ့ ယောဂလေ့ကျင့်ခန်းကိုလည်း လုပ်ဆောင်ပေးသင့်ပါတယ်။ ကိုယ်ခန္ဓာအောက်ပိုင်းအဆီများကို နည်းပါးစေဖို့ကူညီပေးပြီး အကြောအလုပ်လုပ်မှုကို တိုးတက်စေပါတယ်။ ယောဂလေ့ကျင့်ခန်းဟာ စိတ်ဖိစီးမှုကိုလည်း လျော့ကျစေသည့်အတွက် ဆီးချိုသမားများအတွက် အထူးသင့်တော်လှပါတယ်။
ကိုယ့်ရဲ့မိသားစုဝင်တစ်ယောက်ယောက် သို့မဟုတ် အသိမိတ်ဆွေတစ်ယောက်ယောက်ဟာ ဆီးချိုရောဂါရှိနေတယ်ဆိုရင်တော့ ဒီလိုမျိုးလေ့ကျင့်ခန်းလေးတွေလုပ်ပေးဖို့ တိုက်တွန်းလိုက်ပါ။
