နေ့စဉ်နေ့တိုင်း လုပ်ဆောင်နေကြတဲ့ လုပ်ငန်းဆောင်တာတွေမှာ လက်တစ်စုံက မဖြစ်မနေကို အသုံးပြုဖြစ်ကြပါတယ်။ မကြာခဏလက်ဆေးခြင်း၊ ပြင်းထန်တဲ့ဓာတုဓာတ်ပစ္စည်းတွေ၊ အစွန်းအထင်းတွေနဲ့လည်း အမြဲလိုလို ထိတွေ့နေပါတယ်။ ဒီလိုမျိုးတွေ ထိတွေ့နေရပေမယ့်လည်း လူအချို့ကတော့ အထူးဂရုတစိုက်မရှိကြလို့ လက်တွေမှာ ခြောက်သွေ့၊ ကြမ်းတမ်းမှုတွေ ဖြစ်လာရတာပါ။
ဒါကြောင့် ကိုယ့်ရဲ့လက်ကလေးတွေ ပြန်လည်နုပျိုစိုပြေလာစေဖို့ လုပ်ဆောင်နိုင်မယ့် အိမ်တွင်းနည်းလမ်းကောင်းလေးတွေကို ဖော်ပြပေးလိုက်ရပါတယ်။
၁။ သံလွင်ဆီ
သံလွင်ဆီထဲက Antioxidants တွေနဲ့ ကျန်းမာညီညွတ်တဲ့ ဖက်တီးအက်စစ်တွေက ခြောက်သွေ့တဲ့လက်တွေကို ပြန်လည်စိုပြေလာစေပါတယ်။ အသားအရေကို နူးညံ့အိစက်လာစေပြီး ရင့်ရော်တဲ့လက္ခဏာတွေကို လျော့ကျစေပါတယ်။
သံလွင်ဆီအနည်းငယ်ကို အပူပေးပြီး လက်ပေါ်မှာ ငါးမိနစ်ကြာ ညှင်သာစွာ ပွတ်လိမ်းပေးပါ။ တနေ့လျှင် နှစ်ကြိမ်လုပ်ပေးဖို့လိုအပ်ပါတယ်။
၂။ ပျားရည်
ပျားရည်နဲ့ဂလစ်စရင်း ပမာဏ အညီအမျှကို ရောစပ်ပြီး လက်ပေါ်မှာ သုတ်လိမ်းပေးပါ။ ၁၅ မိနစ်ကြာအောင် ထားပေးပြီးသည်နှင့် ရေနွေးနွေးလေးနဲ့ သန့်စင်ဆေးကြောပေးပြီးနောက် ခြောက်အောင်သုတ်ပေးပါ။ နေ့စဉ်မှန်မှန်လုပ်ပေးပါက ရလဒ်ကောင်းလေးတွေကို မြင်တွေ့နိုင်မှာပါ။
၃။ အုတ်ဂျုံမှုန့်
ကြိတ်ထားတဲ့ အုတ်ဂျုံမှုန့် လက်ဖက်ရည်ဇွန်း ၂ ဇွန်းကို ပျားရည် လက်ဖက်ရည်ဇွန်း ၁ ဇွန်းနဲ့ ပန်းကန်လုံးထဲရောပေးပါ။ သံပယိုရည်အစက် အနည်းငယ်ကိုလည်း ရောထည့်ပေးပါ။ ရေသင့်တင့်ရုံထည့်ပြီး သေချာမွှေပေးပါ။ လက်ပေါ်မှာ မိနစ်အနည်းငယ်ကြာအောင် ပွတ်လိမ်းပေးပြီး ၁၀ မိနစ်ကြာသည့်နောက် ရေနွေးလေးနဲ့ ဆေးကြောသန့်စင်နိုင်ပါတယ်။
တပတ်လျှင် တစ်ကြိမ် မှန်မှန်လုပ်ဆောင်ပေးပါ။
၄။ သံပယိုရည်
လက်နှစ်ဖက်ကို ဆပ်ပြာ၊ ရေနွေးနွေးတို့နှင့် ဆေးပေးပြီး တဘက်နုနုလေးနဲ့ သုတ်ပေးပါ။ မုန့်ဖုတ်ဆိုဒါ၊ ပျားရည်၊ သံပယိုရည်တို့ကို အချိုးအစားညီမျှစွာ ပေါင်းစပ်ပြီး မိနစ်အနည်းငယ်လောက် လက်မှာ ညှင်သာစွာ ပွတ်လိမ်းပေးပါ။ ၁၀ မိနစ်ထားပေးပြီးရင် ရေနွေးနွေးလေးနဲ့ ဆေးကြောသန့်စင်နိုင်ပါတယ်။
ခြောက်အောင်သုတ်ပေးပြီးရင် Moisturizer ပါးပါးလေးကို လိမ်းပေးပါ။ တပတ်လျှင် ၂ ကြိမ်မှ ၃ ကြိမ် မှန်မှန်လုပ်ဆောင်ပေးရန် လိုအပ်ပါတယ်။
၅။ ဒိန်ချဉ်
မုန့်ညက် လက်ဖက်ရည်ဇွန်း ၁ ဇွန်းကို အချိုမပါသည့် ဒိန်ချဉ် လက်ဖက်ရည်ဇွန်း ၃ ဇွန်းနဲ့ ရောစပ်ပြီး ပျစ်နှစ်သည်အထိ မွှေပေးပါ။ လက်ပေါ်မှာ မိနစ်အနည်းငယ်လောက် ညှင်သာစွာ သုတ်လိမ်းပေးပြီးရင် မိနစ်အနည်းငယ်အခြောက်ခံကာ ရေနွေးနွေးလေးနဲ့ သန့်စင်ပေးနိုင်ပါတယ်။
တပတ်လျှင် ၁ ကြိမ်မှ ၂ ကြိမ် မှန်မှန်လုပ်ပေးမယ်ဆိုရင် ရလဒ်ကောင်းတွေကို မြင်တွေ့နိုင်မှာပါ။
