နေ့စဉ်နှင့်အမျှ နာရီပေါင်းများစွာ ခြေထောက်တွေပေါ်ရပ်တည်၍ အလုပ်လုပ်နေကြရပါတယ်။ မတ်တပ်ရပ်နေတဲ့အချိန်တွေမှာ ခန္ဓာကိုယ်တစ်ခုလုံးရဲ့ အလေးချိန်ကိုထိန်းထားရတဲ့အတွက် လမ်းလျှောက်ခြင်းဖြစ်စေ၊ တစုံတရာပြုလုပ်တဲ့အချိန်မှာဖြစ်စေ ခြေထောက်နာကျင်မှုဒဏ်ကို ခံစားလာရ နိုင်ပါတယ်။ ခြေထောက်နှင့်ပတ်သက်ပြီး ကျန်းမာရေးကို အလေးအနက်ထားပြီး ဂရုမစိုက်ဘူးဆိုလျှင် ထိုကဲ့သို့ခြေထောက်နာကျင်ဒဏ်ရာသာမက အဆစ်ရောင်ရောဂါ၊ ဒူလာရောဂါ၊ ခြေထောက်ရောင်ရောဂါ နှင့် အခြားရောဂါအစုံအလင်ကို ခံစားလာရနိုင်ပါတယ်။
ထို့အတွက် အိမ်တွင်ပင်အလွယ်တကူပြုလုပ်နိုင်သည့် လေ့ကျင့်ခန်းများနှင့်ပြေလျော့စေသည့်လုပ်ငန်းစဉ်များကို လုပ်ဆောင်ပေးခြင်းက အချိန်ကုန်လည်းသက်သာကာ ပင်ပန်းနာကျင်နေသည့်ခြေထောက်တို့ကို သက်သာစေမှာဖြစ်ပါတယ်။ ညနေပိုင်းဖြစ်စေ၊ ညဖက်တွင်ဖြစ်စေ တီဗွီကြည့်နေစဉ်လုပ်ဆောင်နိုင်သည့် လေ့ကျင့်ခန်းလေးများကို ဖော်ပြပေးလိုက်ရပါတယ်။
၁။ ခြေမကိုမြှင့်၊ တင်၊ ကွေးလေ့ကျင့်ခန်း
ခြေထောက်ကိုကျန်းမာသန်စွမ်းလိုသူများ လုပ်ဆောင်သင့်သည့် အခန်းသုံးခန်းလေ့ကျင့်ခန်းတစ်ခုပါ။ ထိုလေ့ကျင့်ခန်းကိုပြုလုပ်ပေးခြင်းက ခြေထောက်ကိုပျော့ပျောင်းလာစေရုံသာမက ပိုမိုသန်မာလာစေမှာဖြစ်ပါတယ်။ ကုလားထိုင်တွင်မတ်မတ်ထိုင်ပြီး ခြေထောက်နှင့်ခြေချောင်းများကို ကြမ်းပြင်ပေါ်တွင်ထားပါ။ ခြေချောင်းများကို ၅ စက္ကန့်ပင့်တင်ပေးပါ။ ပြီးလျှင်အကြောဆန့်ပြီးနောက် နောက်ထပ် ၅ စက္ကန့်ဆန့်တန်းပေးပါ။ ထို့နောက် ခြေဖနောင့်ကိုအပေါ်တွင်ထားပြီး ခြေချောင်းများကို ၅ စက္ကန့်ခေါက်ချိုးထားပေးပါ။ တစ်ခါလုပ်လျှင် ဆယ်ခါပြုလုပ်ပေးပါ။
၂။ တဘက်ကောက်ယူသည့်လေ့ကျင့်ခန်း
ဤလေ့ကျင့်ခန်းသည် ခြေထောက်ထိပ်ရှိကြွက်သားများနှင့်ခြေချောင်းလေးများကို သန်မာလာစေပါတယ်။ ခြေချောင်းကြွက်တက်တတ်သူများ၊ ခြေဖနောင့်နာကျင်တတ်သူများ ပြုလုပ်ရန်အထူးသင့်တော်ပါတယ်။ တဘက်တစ်ထည်ကို ကုလားထိုင်အရှေ့ရှိ ကြမ်းပြင်ပေါ်တွင်ဖြန့်လိုက်ပါ။ ကြမ်းပြင်ပေါ်ခြေဖဝါးတစ်သားတည်းထားကာ ကုလားထိုင်ပေါ်တွင်မတ်မတ်ထိုင်ပြီး ခြေချောင်းတစ်ချောင်းကို တဘက်၏အဆုံးပေါ်တင်လိုက်ပါ။ ပြီးနောက် ခြေချောင်းများကိုအသုံးပြုကာ တဘက်ကိုဆွဲလိုက်တွန်းလိုက် ပြုလုပ်ပါ။ တနေ့လျှင် ၆ ကြိမ်မှ ၈ ကြိမ်အထိလုပ်ဆောင်ပေးနိုင်ပါတယ်။
၃။ ထိုင်လျက်ခြေချောင်းများကိုအကြောဆန့်ခြင်း
ခြေဖဝါးကို အကြောဆန့်ပေးခြင်းဖြင့် ခြေသလုံးကြွက်သားများလည်း အကြောအခြင်ပြေသွားနိုင်ပါတယ်။ ကြမ်းပြင်နှင့်ခြေဖဝါးထိပြီး ထိုင်ခုံတွင် ခြေချိတ်ထိုင်ပါ။ ခြေချောင်းလေးများကို ညင်သာစွာဆွဲပြီး ၁၀ စက္ကန့်ခန့်ထားပေးပါ။
၄။ ဂေါက်လုံးလှိမ့်ပေးခြင်း
ခြေဖဝါးခွက်ကဲ့သို့သော အခုံးရှိနာကျင်မှုကို လျော့ကျစေပြီး ခြေထောက်ပျော့ပျောင်းမှုကို ဖြစ်ပေါ်စေပါတယ်။ ထိုမျှသာမက ခြေထောက်နှင့် အောက်ပိုင်းရှိကြွက်သားများကို တင်းရင်းမှုရှိစေရန် ကူညီပေးပါတယ်။ ကုလားထိုင်တွင် မတ်မတ်ထိုင်ပြီး ဂေါ့ဖ် သို့မဟုတ် တင်းနစ်ဘောလုံးကို ခြေထောက်နားတွင်ထားကာ ထိုဘောလုံးပေါ်တွင်ခြေထောက်ကိုတင်ပေးပါ။ ခြေထောက်တဖက်တိုင်းတွင် နှစ်မိနစ်မှ သုံးမိခန့်အထိ ဖြည်းဖြည်းချင်း ဘောလုံးကိုလှိမ့်ပေးနိုင်ပါတယ်။ ဂေါ့ဖ်လုံးမရှိပါက ခဲကျစ်နေသောရေခဲတုံးကို အသုံးပြုနိုင်ပါတယ်။
Photo credit: wiki how
