ဟင်းသီးဟင်းရွက်တွေကို အရသာရှိအောင်၊ အာဟာရတွေ အများကြီး ရရှိအောင် ချက်ပြုတ်နိုင်တဲ့ နည်းလမ်းတွေ အများကြီးရှိပါတယ်။
ဟင်းချက်နည်းတွေက အများကြီးရှိနေတာကြောင့် ကိုယ်ချက်မယ့် ဟင်းသီးဟင်းရွက်နဲ့ ကိုက်ညီမယ့် နည်းလမ်းတွေကို ရှာဖွေစဉ်းစားဖို့ လိုအပ်ပါတယ်။
အာဟာရပညာရှင် လင်ဆေး ပိုင် (Lindsey Pine) က အခုမှ ဟင်းစချက်မယ့်သူတွေအတွက် အကြံပေးစကားတစ်ခု ပြောခဲ့ပါတယ်။ “ ဟင်းသီးဟင်းရွက်တွေကို ပြုတ်ပြီး မချက်ပါနဲ့၊ ပြုတ်လိုက်ရင် အဖိုးတန်တဲ့ အာဟာရအများစုက ရေထဲရောက်သွားပါတယ်” လို့ ပြောပါတယ်။
ဟင်းချိုမလုပ်ဘဲ ပြုတ်တာမျိုးဆိုရင် ဟင်းသီးဟင်းရွက်မှာပါဝင်တဲ့ အာဟာရဓာတ်တွေ အလကားဖြစ်သွားတယ်လို့ ထည့်သွင်းပြောပါတယ်။
တချို့ ဟင်းသီးဟင်းရွက်တွေက အပူနဲ့ထိမှ သို့ ဟင်းချက်လိုက်မှ အာဟာရဓာတ် ပိုစုပ်ယူနိုင်တာမျိုး ရှိပါတယ်။
အနီ၊ လိမ္မော်၊ အဝါ နဲ့ အစိမ်းရောင် ဟင်းသီးဟင်းရွက်များ
မုန်လာဥနီ၊ ငရုတ်ပွသီး၊ ဗရုံသီး၊ ခရမ်းချဉ်သီး စသည်တို့ ဖြစ်ပါတယ်။
ဒီလို ဟင်းသီးဟင်းရွက်တွေမှာ Carotenoids ဆိုတဲ့ ဓာတ်ကြွယ်ဝစွာပါဝင်နေပြီး မျက်လုံးကျန်းမာရေးအတွက် အဓိကကောင်းပါတယ်။ Carotenoids ဓာတ်က အပူချိန်နဲ့ ထိတွေ့လိုက်ရင် ခန္ဓာကိုယ်က ပိုပြီး စုပ်ယူနိုင်ပါတယ်။
အဲ့ဒီအပြင် ခရမ်းချဉ်သီးမှာပါဝင်ပြီး ကင်ဆာ ရောဂါကို ကာကွယ်ပေးတဲ့ Antioxidant တစ်မျိုးဖြစ်တဲ့ Lycopene ဓာတ်ကို ဟင်းချက်လိုက်မှသာ ခန္ဓာကိုယ်က ရရှိတာပါ။ ခရမ်းချဉ်သီးကို အစိမ်းစားရင် အဲ့ဒီဓာတ်ကို ရရှိမှာ မဟုတ်ပါဘူး။
အစိမ်းရောင် အရွက်များ
ကိုက်လန်၊ ဟင်းနုနွယ် ၊ ဂေါ်ဖီ၊ မုန်ညှင်း စသည်တို့ ဖြစ်ပါတယ်။
အစိမ်းရောင် အရွက်တွေမှာ Oxalic အက်ဆစ် ဓာတ်ပါဝင်ပြီး ဒီဓာတ်တွေက ခန္ဓာကိုယ်က ကယ်ဆီယမ်နဲ့ သံဓာတ် စုပ်ယူရာမှာ အနှောင့်အယှက်ပေးတယ်လို့ အာဟာရပညာရှင် Levinson က ပြောပါတယ်။
ဒါပေမယ့် အပူနဲ့ ထိတွေ့ရင် သို့ ဟင်းချက်လိုက်ရင် Oxalic အက်ဆစ်ကို ဖြိုခွဲလိုက်သလိုဖြစ်ပြီး အာဟာရဓာတ်တွေကို အလွယ်တကူ စုပ်ယူနိုင်သွားပါတယ်။
သို့ပေမယ့် အစိမ်းရောင်အရွက်တွေမှာ ရေမှာပျော်ဝင်လွယ်တဲ့ ဗီတာမင် B နဲ့ ဗီတာမင် စီတွေ ကြွယ်ဝစွာပါဝင်ပါတယ်။ အဲ့ဒီ ဗီတာမင်တွေက အပူမြင့်မြင့်နဲ့ အကြာကြီး ထိတွေ့ရင် ပျက်စီးသွားတတ်ပါတယ်။ ဒါ့ကြောင့် အပူအေးအေးလေးနဲ့ပေါင်းရင် ဖြစ်ဖြစ်၊ ဆီကောင်းကောင်းနဲ့ မြန်မြန်ကြော်တာမျိုး ပြုလုပ်သင့်ပါတယ်။
ဂေါ်ဖီ ပန်းပွင့်နဲ့ ဂေါ်ဖီပန်းပွင့်စိမ်း
ဂေါ်ဖီ ပန်းပွင့် နဲ့ ဂေါ်ဖီပန်းပွင့် စိမ်း တွေကို အစိမ်းစားမယ်ဆိုရင် ချက်ပြုတ်တာထက် ပရိုတင်းဓာတ်နဲ့ တခြား Antioxidants ဓာတ်တွေ ၃၀ ရာခိုင်နှုန်းလောက် ပိုရပါတယ်။
ဒါပေမယ့် အစိမ်းဆိုရင် အနံ့ကော၊ အရသာကော၊ စားရတာပါ အဆင်မပြေပါဘူး။
ဒါ့ကြောင့် မီးပြင်းပြင်းနဲ့မြန်မြန် ကြော်တာတို့ ပေါင်းတဲ့နည်းလမ်းနဲ့ ချက်ပြုတ်ရင် အကောင်းဆုံးပါဘဲ။
ရေထဲမှ ပြုတ်ရင်တော့ ပါဝင်တဲ့ Antioxidants ဓာတ်၊ သတ္တုဓာတ်တွေ တော်တော်များများ ဆုံးရှုံးကုန်ပါတယ်။ ပြုတ်ထားတဲ့အရည်ကို ဟင်းချို လုပ်သောက်မယ်ဆိုရင်တော ရေထဲရောက်နေတဲ့ အာဟာရဓာတ်တွေ ပြန်လည် ရရှိမှာပါ။
